،تصویر کا ذریعہGetty Images
امریکی صدر ڈونلڈ ٹرمپ نے انڈیا اور پاکستان کے درمیان حالیہ کشیدگی کے حوالے سے اپنے ایک بیان میں کہا ہے کہ دونوں ممالک اپنے درمیان تناؤ کو خود حل کرلیں گے۔
خبر رساں ادارے روئٹرز کے مطابق امریکی صدر ڈونلڈ ٹرمپ نے جمعے کو ایئر فورس ون میں صحافیوں سے بات چیت کے دوران کہا کہ انڈیا اور پاکستان اپنے تعلقات خود آپس میں طے کر لیں گے۔
یاد رہے کہ منگل کو انڈیا کے زیر انتظام جموں و کشمیر کے علاقے پہلگام میں ہونے والے ایک حملے میں 26 افراد ہلاک ہوئے تھے جن میں زیادہ تر سیاح تھے۔ انڈیا نے اس حملہ میں پاکستان کے ملوث ہونے کا الزام عائد کیا ہے تاہم پاکستان نے اس کی سختی سے تردید کی ہے۔
اس حملے کوتقریباً دو دہائیوں میں سب سے سنگین واقعہ قرار دیا جا رہا ہے اور اس کے بعد دونوں ہمسایہ ممالک کے درمیان کشیدگی بڑھ گئی ہے۔
روئٹرز کے مطابق صدر ٹرمپ نے صحافیوں سے بات کرتے ہوئے متنازع سرحدی علاقے میں پیش آنے والے دیگر تنازعات کا حوالہ دیا اور کہا کہ وہ دونوں ممالک کے رہنماؤں کو جانتے ہیں تاہم لیکن جب ان سے پوچھا گیا کہ کیا وہ ان سے رابطہ کریں گے تو انھوں نے اس کے جواب کے بجائے کہا کہ وہ دونوں کسی نہ کسی طرح اسے حل کر ہی لیں گے۔
صدر ٹرمپ نے کہا کہ ’پاکستان اورانڈیا کے درمیان شدید کشیدگی ہے لیکن ایسا ہمیشہ سے ہی رہا ہے۔‘
یاد رہے کہ نئی دہلی کی طرف سے پانی کی منصفانہ تقسیم کے لیے طے شدہ سندھ طاس معاہدے کی معطلی، اٹاری بارڈر کی بندش سمیت دیگر اقدامات کے جواب میں پاکستان نے انڈین پروازوں کے لیے اپنی فضائی حدود بند کرنے کا اعلان کیا ہے۔
دوسری جانب اسلام آباد میں ترجمان دفتر خارجہ شفقت علی خان نے اپنی پریس بریفنگ کے دوران کہا کہ اگر انڈیا نے پانی روکا تو بھرپور جواب دیا جائے گا جبکہ اسے ’اقدام جنگ سمجھا جائے گا۔‘
ان کا کہنا تھا کہ سندھ طاس معاہدے کی خلاف ورزی انڈیا کا ’غیر ذمہ دارانہ اقدام ہے۔‘
دوسری جانب اقوام متحدہ نے پاکستان اور انڈیا سے ’زیادہ سے زیادہ تحمل کا مظاہرہ‘ کرنے پر زور دیا ہے۔
