پہلگام جیسے معروف سیاحتی مقام پر کوئی انڈین فوجی یا پولیس اہلکار کیوں موجود نہیں تھا؟ وہ اہم سوالات جو اس معاملے کو پیچیدہ بنا رہے ہیں – BBC News اردو

انھوں نے مزید کہا کہ ’میرے خیال میں وہاں مسلح پولیس کی موجودگی ہونی چاہیے تھی۔ پولیس یا نیم فوجی دستوں کو وہاں ہونا چاہیے تھا۔ اگر وہ وہاں ہوتے تو دہشت گردوں سے نمٹ سکتے تھے۔ یہ بھی سچ ہے کہ ہر جگہ پولیس اہلکار موجود نہیں ہو سکتے کیونکہ وسائل محدود ہیں۔ لیکن اگر سیاح دور دراز کے علاقے میں جا رہے تھے تو وہاں کچھ پولیس والوں کو ہونا چاہیے تھا۔‘

لیفٹیننٹ جنرل (ریٹائرڈ) ستیش دوآ ایک طویل عرصے تک جموں و کشمیر میں تعینات رہے ہیں۔ وہ کہتے ہیں کہ ’فوج اور نیشنل رائفلز (اے آر) کے اہلکار ہر جگہ موجود نہیں ہو سکتے۔ وہ دہشت گردوں سے نمٹنے کے لیے سرحد پر تعینات ہیں۔ اب اگر ہم پولیس کی بات کریں تو وادی کشمیر 120 کلومیٹر لمبی اور 38 کلومیٹر چوڑی ہے۔ ہر جگہ پولیس اہلکاروں کو تعینات کرنا ممکن نہیں ہے۔‘

بی بی سی نے پہلگام کے کئی مقامی لوگوں سے بیسرن میں حفاظتی انتظامات کے بارے میں بات کی۔ ان کا کہنا تھا کہ یہ حملہ سکیورٹی کی مجموعی خامی کا نتیجہ ہے۔

ان کا دعویٰ ہے کہ جس پارک میں اتنی بڑی تعداد میں سیاح آتے ہیں وہاں ایک بھی سی سی ٹی وی کیمرہ نصب نہیں ہے۔

ایک اور مقامی نے بتایا کہ جس جگہ پر دن بھر سیاح آتے ہیں وہاں ایک بھی سکیورٹی اہلکار تعینات نہیں تھا۔

ایک پولیس افسر نے بھی تصدیق کی کہ بیسرن میں کوئی سی سی ٹی وی کیمرے نصب نہیں ہے۔

ایک اور سینیئر سکیورٹی اہلکار نے بی بی سی بتایا کہ اس دن بیسرن کے ٹریک پر یا بیسرن پارک کے آس پاس یا پارک کے اندر کوئی سکیورٹی اہلکار موجود نہیں تھا۔

سی آر پی ایف کے ایک سینیئر افسر نے بتایا کہ سی آر پی ایف کو کہیں بھی تعینات کرنے سے پہلے پولیس یا فوج سے اجازت لینی پڑتی ہے۔

پہلگام حملے میں عام شہریوں کو نشانہ بنانے پر بھی سوال اٹھا ہے۔ اس حملے میں شدت پسندوں نے ایسا طریقہ اپنایا جو ماضی میں اس خطے میں ہوئے دوسرے حملوں سے مختلف تھا۔

اس حملے میں فوجی یا پولیس نہیں بلکہ عام شہریوں کو نشانہ بنایا گیا۔ جموں و کشمیر یا ملک کے کسی بھی حصے میں طویل عرصے بعد اس طرح کا یہ پہلا حملہ تھا، جس میں اتنے بڑے پیمانے پر عام لوگوں کو نشانہ بنایا گیا تھا۔

ریٹائرڈ لیفٹیننٹ جنرل ستیش دوآ اس کی تفصیل بتاتے ہیں۔ ’گذشتہ پانچ برسوں میں وادی کشمیر کے حالات میں بہتری اور ایک مثبت تبدیلی آئی ہے۔ لوگ دوبارہ معمول کی زندگی کی طرف لوٹنے لگے ہیں۔ سیاحت بھی بہت تیزی سے بڑھنے لگی ہے۔ دہشت گرد کبھی بھی سیاحتی علاقوں کو نشانہ نہیں بناتے ہیں۔‘

’یہ پوری دنیا میں اور خاص طور پر کشمیر میں ایک بڑا سچ ہے کیونکہ اگر دہشت گرد ایسا کرتے ہیں تو وہ مقامی کشمیریوں کی روزی روٹی کو نشانہ بنائیں گے۔ وہ مقامی لوگوں سے حمایت کی توقع رکھتے ہیں اس لیے اس قسم کی حرکت سے وہی حمایت کھوئيں گے۔ اس لیے ہماری یہ سمجھ رہی ہے کہ دہشت گرد عام لوگوں کو نشانہ نہیں بنائیں گے۔‘

انھوں نے مزید کہا کہ ’جب میں کور کمانڈر تھا، تب بھی لوگ مجھ سے پوچھتے تھے کہ کیا وہ کشمیر (سیاحت کے لیے) آ سکتے ہیں؟ میں نے ہمیشہ اُن سے کہا، براہ کرم آئیں۔ آپ ڈل جھیل کے قریب بیٹھ سکتے ہیں یا سیاحتی مقامات کا دورہ کر سکتے ہیں کیونکہ ان جگہوں پر حملے نہیں ہوتے ہیں۔‘

پروفیسر امیتابھ مٹّو اس حملے میں عام شہریوں کو نشانہ بنانے کی وجہ پر سوال اٹھاتے ہیں۔

وہ کہتے ہیں کہ ’دہشت گرد گروپوں نے عام شہریوں کو کیوں نشانہ بنانا شروع کر دیا ہے؟ پہلے وہ زیادہ تر فوجی تنصیبات کو نشانہ بناتے تھے۔ اس بار انھوں نے کشمیری عوام کے جذبات کا کوئی خیال نہیں رکھا۔ کیا یہ معمول کے تصور کو مسترد کرنا ہے؟‘

‘پہلے، دہشت گرد گروپوں کی یہ حکمت عملی تھی کہ وہ فوجی اہداف اور دوسرے اہداف، جن کا مقامی آبادی پر اثر پڑ سکتا ہے، کے درمیان فرق کرتے تھے۔ اب یہ فرق ختم ہو گیا ہے۔ سوائے اس کے کہ اس بار انھوں نے ہندوؤں کو نشانہ بنایا۔‘

دوآ کا یہ بھی ماننا ہے کہ شہریوں کو نشانہ بنانے کی ایک وجہ ملک کے باقی حصوں میں جذبات کو بھڑکانا ہو سکتا ہے۔

انھوں نے کہا کہ ’دہشت گردوں نے کیا کیا؟ انھوں نے ہندو مردوں کو الگ کر کے قتل کیا، مقصد یہ تھا کہ خواتین اپنے شہروں میں واپس جائیں اور اس واقعے کی کہانی سنائیں۔ عورت کی دردناک چیخ کا ہر طرف اثر ہوتا ہے اور پھر اس سے ملک کے مختلف حصوں میں جذبات بھڑک اٹھیں گے۔ انڈیا کو فیصلہ کرنا ہے کہ ہم ان کے جال میں نہ آئیں۔‘

ان کے مطابق یہ 2023 میں اسرائیلیوں پر حماس کے حملے جیسا ہے۔

وہ کہتے ہیں کہ ’انھوں نے حماس کا انداز اپنایا ہے، جیسا کہ حماس نے نووا میوزک فیسٹیول (اسرائیل) میں کیا تھا۔ اس کی وجہ یہ ہے کہ معصوم شہریوں، خاص طور پر سیاحوں کو مارنے کا لوگوں پر سکیورٹی فورسز کو مارنے سے زیادہ اثر پڑتا ہے۔‘

امیتابھ مٹو نے الزام عائد کیا انھیں اس حملے میں پاکستان کے ملوث ہونے پر کوئی شک نہیں ہے۔ یاد رہے کہ انڈیا کی حکومت نے اب تک اس حملے کی براہ راست ذمہ داری کسی گروہ یا ملک پر عائد نہیں کی ہے تاہم اس حملے کے بعد پاکستان کے حوالے سے سخت اقدامات کا اعلان کیا ہے۔

تو پھر سوال یہ پیدا ہوتا ہے کہ کیا یہ انٹیلیجنس کی بڑی ناکامی تھی؟

مٹّو کہتے ہیں: ’یہ انٹیلیجنس کی ناکامی ہے۔ ہمیں کوئی ایسی الیکٹرانک معلومات کیوں نہیں مل پائیں جن کے ذریعے ہم اس حملے کی پیش گوئی کر سکتے اور اسے ناکام بنا سکتے۔‘

ریٹائرڈ لیفٹیننٹ جنرل ستیش کا بھی ماننا ہے کہ یہ انٹیلیجنس کی ناکامی تھی۔

جنرل ستیش کہتے ہیں کہ ’کیا ہم کچھ بہتر کر سکتے تھے؟ ہاں۔ میں یہ نہیں کہہ رہا ہوں کہ کوئی کوتاہی نہیں تھی، ہم بہتر انٹیلیجنس اکٹھی کر سکتے تھے۔‘

’اس واقعے سے چند دن پہلے پاکستان کے آرمی چیف نے ایک بیان دیا تھا، اس میں انھوں نے ہندوؤں اور مسلمانوں کے بارے میں بات کی، مسلمانوں کی برتری وغیرہ کی بات کی، ہمیں اس اشارہ کو سمجھنا چاہیے تھا۔ ہمیں ایسی چیزوں کے بارے میں زیادہ محتاط رہنا چاہیے تھا، ہمیں اپنے کانوں اور آنکھوں کو گراؤنڈ پر زیادہ چوکنا رکھنا چاہیے تھا۔‘

انھوں نے مزید کہا کہ ’ملک کو انسانی ذہانت کو بہتر کرنے کی ضرورت ہے۔ اب ہم الیکٹرانک انٹیلیجنس پر بہت زیادہ انحصار کر رہے ہیں۔ یہاں دونوں کا بہتر امتزاج ہونا چاہیے۔‘

پہلگام میں سی آر پی ایف کی ایک کمپنی ہمیشہ تعینات رہتی ہے۔ اس کے علاوہ پہلگام میں فوج کے جوان بھی تعینات رہتے ہیں۔ تاہم ان کی تعداد زیادہ نہیں ہوتی ہے۔

یہ فوجی دستہ پہلگام بازار سے کم از کم چھ کلومیٹر دور تعینات ہے۔ دوسری جانب جائے وقوعہ سے چھ کلومیٹر دور پہلگام بازار میں سی آر پی ایف کی کمپنی تعینات تھی۔

پہلگام میں ایک پولیس سٹیشن بھی ہے۔ پولیس سٹیشن کے علاوہ وہاں ایک خصوصی ٹاسک فورس بھی موجود ہے۔ مجموعی طور پر پولیس سٹیشن میں کم از کم 40 پولیس اہلکار ہیں۔

پہلگام کی ایک 50 سالہ خاتون نے بتایا کہ کچھ سال پہلے تک میں لکڑیاں جمع کرنے کے لیے بیسرن کے راستے جنگل جاتی تھی۔ میں نے اس علاقے میں کبھی سکیورٹی اہلکار نہیں دیکھے۔

ایک پولیس افسر نے بی بی سی بتایا کہ پہلگام کئی سالوں سے پرامن ہے۔ یہی وجہ ہے کہ پولیس یا سکیورٹی فورسز کو اندازہ نہیں تھا کہ ایسا بھی ہوسکتا ہے۔

انھوں نے یہ بھی کہا کہ سکیورٹی فورسز کو حد سے زیادہ اعتماد تھا کہ پہلگام میں کوئی انتہا پسندی کا واقعہ پیش نہیں آسکتا۔

ایک ذریعے نے بتایا کہ حملے سے پہلے بیسرن میں 1,092 سیاح موجود تھے۔ حملے کے وقت تقریباً 250 سے 300 سیاح موجود تھے۔ ان کے مطابق حملے سے پہلے تقریباً 2500 سیاح روزانہ بیسرن کا دورہ کرتے تھے۔

پہلگام بازار سے بیسرن تک کا راستہ پتھریلی پہاڑیوں اور گھنے جنگلات سے گزرتا ہے۔ وہاں جانے والے سیاح یا تو گھوڑے پر جاتے ہیں یا پیدل۔

(پہلگام سے ماجد جہانگیر کے ان پٹ کے ساتھ)