،تصویر کا ذریعہGetty Images
میری ماں کا ہمیشہ سے ایک اصول رہا ہے: گھر میں داخل ہوتے ہوئے جوتے اندر نہیں لائے جا سکتے۔ اس بات سے کوئی فرق نہیں پڑتا ہے کہ آپ کون ہیں- خاندان، پڑوسی، یا مہمان۔ آپ کو دہلیز کو عبور کرنے سے پہلے جوتا اتارنا پڑتا تھا۔
بچپن میں میری رائے ان کے اس حکم پر الگ تھی۔ لیکن جیسے جیسے میں بڑی (اور سمجھدار) ہوئی مجھے احساس ہوا کہ یہ حکم جنونی نہیں تھا۔ یہ صحت، حفاظت اور حفظان صحت کے بارے میں تھا۔
صفائی کا تعلق اکثر نظر آنے والی گندگی سے ہوتا ہے۔ لیکن جب جوتوں کی بات آتی ہے جو سطح کے نیچے چھپا ہوتا ہے وہ اکثر خورد بینی ہوتا ہے۔ یہ ذرا سے کیچڑ یا خشک گھاس سے کہیں زیادہ خطرناک ہے۔
جوتے میں بیکٹیریا کے ساتھ ساتھ الرجی یا زہریلے کیمیکل ہوتے ہیں جن میں سے بہت سے سنگین صحت کے مسائل سے منسلک ہوتے ہیں۔
غور کریں کہ آپ کے جوتے ہر روز کہاں سے گزرتے ہیں: پبلک ٹوائلٹ، فٹ پاتھ، ہسپتال، اور میدانوں یا باغیچوں یا پارکس سے جہاں گھاس اور کیڑوں کو کنٹرول کرنے کے لیے جڑی بوٹیوں اور کیڑے مار ادویات جیسے کیمیکلز سپرے کیے جاتے ہیں۔
امریکہ میں ایریزونا یونیورسٹی کی ایک تحقیق کے مطابق مجموعی طور پر 96 فیصد جوتوں میں کولیفارم بیکٹیریا پائے گئے جو عام طور پر آنتوں میں پائے جاتے ہیں۔
اس سے بھی زیادہ پریشان کن، 27 فیصد میں ای کولی ہے۔ یہ وہ بیکٹیریا ہے جو مختلف انفیکشنز کا سبب بنتا ہے جن میں سے کچھ جان لیوا ہیں۔
،تصویر کا ذریعہGetty Images
بی بی سی اردو کی خبروں اور فیچرز کو اپنے فون پر حاصل کریں اور سب سے پہلے جانیں پاکستان اور دنیا بھر سے ان کہانیوں کے بارے میں جو آپ کے لیے معنی رکھتی ہیں
سبسکرائب کرنے کے لیے کلک کریں
مواد پر جائیں
اگرچہ ای کولی کی کچھ اقسام بے ضرر ہوتی ہیں مگر اس سے دوسرے زہریلے بیکٹیریا پیدا ہوتے ہیں جو خونی اسہال کا سبب بن سکتے ہیں اور ہیمولیٹک یوریمک سنڈروم کا باعث بن سکتے ہیں۔ یہ ایک جان لیوا حالت ہے جس کے نتیجے میں انسان کے گردے فیل ہو جاتے ہیں۔
پانچ سال سے کم عمر کے بچوں کو مدافعتی نظام کی نشوونما کا خاص خطرہ ہوتا ہے۔ والدین کو یہ تشویش بھی رہتی ہے کہ کہیں ان کے منھ کے راستے جراثیم داخل ہو نہ ہوجائیں۔
لیکن ای کولی واحد جراثیم نہیں جو آپ کے کمرے میں چھپ جاتا ہے۔ جوتے کلوسٹریڈیم ڈیفیسائل بھی لے کر آتے ہیں جو کہ بعض اوقات شدید اور تکلیف دہ اسہال کا باعث بننے والے بیکٹیریا کو بھی جوتوں میں لے کر آتے ہیں جو کہ نمونیا یا ہڈیوں پر حملہ کرتے ہیں۔
اس کے علاوہ ایم آر ایس اے ہے جو کہ دوا کے خلاف مزاحمت کرنے والا ’سپر بگ‘ ہے جو جِلد کے گہرے انفیکشن، نمونیا، یا خون کے مہلک انفیکشن کا سبب بن سکتا ہے۔
صحت کو خطرات فقط بیکٹیریا تک نہیں بلکہ اس سے آگے تک ہو سکتے ہیں۔ ہمارے جوتے کیمیکلز اور الرجی کے کیریئر کے طور پر بھی کام کرتے ہیں۔
تحقیقات سے پتہ چلتا ہے کہ باہر سے لائے جوتوں میں کیڑے مار ادویات، جڑی بوٹیوں کو مارنے والی اور بھاری دھاتیں جیسے سیسہ شامل ہو سکتا ہے، جو خاص طور پر چھوٹے بچوں اور پالتو جانوروں کے لیے سنگین صحت کے خطرات کا باعث بنتے ہیں۔
سیسہ جو اکثر شہر میں دھول یا مٹی میں ہوتا ہے، خاص طور پر بچوں کے لیے نقصان دہ ہے، کیونکہ یہ دماغ کی نشوونما کو متاثر کر سکتا ہے اور مستقل علمی مسائل کا سبب بن سکتا ہے۔
مزید یہ کہ جرگ جیسے الرجین تلووں پر چپک سکتے ہیں، جس سے الرجی اور سانس کے مسائل میں اضافہ ہو سکتا ہے جس میں محفوظ پناہ گاہ ہونی چاہیے۔
اس سے بھی زیادہ تشویشناک بات یہ ہے کہ سڑکوں پر استعمال ہونے والے اسفالٹ سیلنٹ میں سرطان پیدا کرنے والے مرکبات ہوتے ہیں۔ ایک امریکی تحقیق سے یہ بات سامنے آئی ہے کہ یہ کیمیکل گھر کے اندر پائے جاتے ہیں اور گھر کی دھول میں باہر کی نسبت 37 گنّا زیادہ برقرار رہتے ہیں۔
اور یہ بتائیے کہ کون زیادہ وقت زمین کے قریب گزارتا ہے؟ بچے اور پالتو جانور۔
بچے رینگتے ہیں، کھیلتے ہیں اور اکثر اپنے ہاتھ منہ میں ڈالتے ہیں۔ پالتو جانور ان آلودہ سطحوں پر چلنے کے بعد اپنے پنجے چاٹتے ہیں۔ بیرونی جوتے گھر کے اندر پہننے سے آپ کا غیر ارادی طور پر سامنا نقصان دہ مادوں سے ہوجاتا ہے۔
صاف مٹی، صحت مند گھر
،تصویر کا ذریعہGetty Images
یہ سب دیکھ کر مجھے اپنی ماں کی جوتے باہر اتارنے کے لیے تاکید اب ان کی جذباتیت نہیں لگتی۔ درحقیقت یہ صحت عامہ کے سب سے آسان اور موثر ترین اقدامات میں سے ایک ہوسکتا ہے جو آپ اپنے گھر پر لے سکتے ہیں۔
داخل ہونے پر اپنے جوتے اتار کر، آپ نہ صرف قالین کو داغدار ہونے سے روکتے ہیں بلکہ آپ اپنے خاندان کو نقصان دہ جراثیم سے بھی بچاتے ہیں۔
اور سچ کہوں تو یہ کرنا مشکل نہیں ہے۔ داخلے کے راستے پر جوتوں کے ذخیرہ کرنے کی جگہ مقرر کرنے پر غور کریں یا شاید جوتوں کا ریک یا ٹوکری، اور یہاں تک کہ مہمانوں کے لیے کچھ آرام دہ چپل بھی شامل کریں۔
کسی کو اپنے جوتے اتارنے کے لیے کہنا پہلے تو عجیب ہوسکتا ہے لیکن اس بات کو نظر انداز کرنا آسان ہے کہ آپ کے گھر میں داخل ہونے جیسی معمول کی چیز اس طرح کے پوشیدہ خطرات کا باعث بن سکتی ہے۔
نوٹ: یہ تحریر منال محمد نے لکھی ہے جو برطانیہ کی یونیورسٹی آف ویسٹ منسٹر میں مائیکروبیالوجی کے شعبے میں سینئیر لیکچرر ہیں۔
