کیچڑ، پانی اور لکڑی: وہ فنِ تعمیر جس نے 1604 سال پرانے شہر وینس کو ڈوبنے سے بچا رکھا ہے – BBC News اردو

درختوں کے یہ تنے اس قدر پانی کے نیچے کیچڑ والی زمین میں دھنسے ہوئے تھے کے انھیں اس سے زیادہ نیچے زمین میں دھکیلنا مُمکن نہیں تھا۔ تعمیراتی ڈھانچے کے بیرونی کنارے سے شروع ہو کر بنیادوں کے مرکز کی طرف بڑھتے ہوئے، عام طور پر پیچ دار شکل میں نو تنے فی مربع میٹر میں ہوجود ہوتے تھے۔ اس کے بعد سروں کو ایک باقاعدہ سطح حاصل کرنے کے لیے موڑا جاتا۔

زمین میں گاڑے جانے والے درختوں کے تنوں کے اُوپر انھیں درختوں کی مدد سے حاصل کیے جانے والے تختے اور بیمز کا استعمال بھی کیا گیا۔ بیل ٹاورز کے معاملے میں 20 انچ موٹے تختے یا بورڈز کا استعمال کیا گیا تھا۔ دیگر عمارتوں کے لیے استعمال ہونے والے یہ تختے 8 انچ یا اس سے بھی کم تھے۔ اوک یعنی بلوط کے درخت نے سب سے زیادہ لچکدار لکڑی فراہم کی لیکن یہ سب سے قیمتی بھی تھی۔ (بعد میں اوک یعنی بلوط کے درخت کی لکڑی کا استعمال صرف بحری جہاز بنانے کے لیے کیا جاتا تھا)۔ بلوط کی لکڑی یا دیگر درختوں سے حاصل کی جانے والی لکڑی کی اس بنیاد کے اوپر پھر مزدور عمارت کی تعمیر کے لیے پتھر کا رکھتے تھے۔

جمہوریہ وینس نے جلد ہی اپنے جنگلات کی حفاظت شروع کر دی تاکہ تعمیر کے ساتھ ساتھ بحری جہازوں کے لیے کافی لکڑی فراہم کی جاسکے۔ اٹلی کی نیشنل کونسل فار ریسرچ کے انسٹی ٹیوٹ فار بائیو اکانومی کے ریسرچ ڈائریکٹر نکولا ماچیونی نے درختوں کی کاشت کے طریقہ کار کا حوالہ دیتے ہوئے بتایا کہ ‘وینس نے سلوی کلچر ایجاد کیا (سلوی کلچر یعنی پودوں کی کاشت اور نگہداشت یا اسے تحفظ جنگلات کی ایک شاخ اور شجر کاری بھی کہا جاتا ہے)۔

ماچیونی کے مطابق ’تحفظ کے یہ طریقے تحریر ہونے سے کئی سال پہلے استعمال میں رہے ہوں گے۔ یہی وجہ ہے کہ وادی فیمی آج بھی ایک سرسبز جنگل سے ڈھکی ہوئی ہے۔ تاہم انگلستان جیسے ممالک کو 16 صدی کے وسط تک لکڑی کی قلت کا سامنا تھا۔‘

وینس واحد شہر نہیں ہے کہ جس کی بنیادیوں کا انحصار لکڑی یعنی درختوں کے تنوں پر ہے لیکن چند ایسے اہم اختلافات ہیں جو اسے منفرد بناتے ہیں۔ ایمسٹرڈیم ایک اور شہر ہے جو جزوی طور پر درختوں کے تنوں پر تعمیر کیا گیا ہے، یہاں اور بہت سے دیگر شمالی یورپی شہروں میں اسی طریقہ کار کا استعمال کیا گیا ہے کہ لکڑی کے ان تنوں کو پانی کے اندر زمین تہہ تک پہنچایا جاتا ہے، ان کی شکل لمبے ستون کی طرح، یا لکڑی کے میز کی لمبی ٹانگوں کی طرح کام کرتے ہیں۔

یونیورسٹی آف الینوائے میں آرکیٹیکچر کے پروفیسر تھامس لیسلی کہتے ہیں کہ ’اگر چٹان سطح کے قریب ہو تو یہ ٹھیک ہے۔ لیکن بہت سے علاقوں میں، بنیاد ایک لکڑی کے تنے کی پہنچ سے باہر ہے۔ امریکہ میں جھیل مشی گن کے کنارے پر جہاں لیسلی رہتے ہیں پانی کے نیچے زمین سطح سے 100 فٹ نیچے ہوسکتی ہے۔‘

وہ کہتے ہیں کہ ‘اتنے بڑے درخت تلاش کرنا مشکل ہے۔ 1880 کی دہائی میں شکاگو کی کہانیاں موجود تھیں کہ جہاں انھوں نے ایک درخت کے تنے کو دوسرے درخت کے اوپر رکھنے کی کوشش کی جس کا آپ تصور کرسکتے ہیں مگر یہ طریقہ کارآمد ثابت نہیں ہوتا تھا۔ آخر کار انھیں احساس ہوا کہ آپ مٹی کی رگڑ پر بھروسہ کر سکتے ہیں۔‘

یہ اصول مٹی کو مضبوط بنانے کے خیال پر مبنی ہے زیادہ سے زیادہ تنوں میں چپک کر تنوں اور مٹی کے درمیان کافی رگڑ پیدا کرکے۔ لیسلی کہتے ہیں کہ ’اس میں سب سے بڑی بات یہ ہے کہ آپ فزکس کا استعمال کر رہے ہیں۔ اس کی خوبصورتی یہ ہے کہ آپ عمارتوں کو برقرار رکھنے کے لیے مزاحمت فراہم کرنے کے لیے مٹی کی سیال فطرت کا استعمال کر رہے ہیں۔‘

لیسلی کا کہنا ہے کہ ’اس کی تکنیکی اصطلاح ہائیڈرواسٹک پریشر ہے جس کا بنیادی طور پر مطلب یہ ہے کہ اگر بہت سے درختوں کے تنوں کو ایک جگہ پر مٹی میں داخل کیا جائے تو مٹی ان تنوں کو ’مضبوطی سے پکڑ‘ لیتی ہے۔‘

اس تکنیک کا ذکر پہلی صدی کے رومن انجینیئر ویٹرویئس نے کیا تھا۔ رومی پلوں کی تعمیر کے لیے زیرِ آب لکڑی کے تنوں کا استعمال کرتے تھے۔ چین میں پانی پر بند لگائے جانے کے لیے بھی لکڑی کے دروازوں کا استعمال کیا جاتا تھا۔

پوزرین کے مطابق ایزٹیک انھیں میکسیکو سٹی میں استعمال کرتے تھے جب تک کہ ہسپانوی نہیں آئے انھوں نے قدیم شہر کو توڑ دیا اور اوپر اپنا کیتھولک گرجا گھر تعمیر کیا۔

پانی میں ڈیڑھ ہزار سال سے زیادہ عرصے کے بعد، وینس کی بنیادیں قابل ذکر طور پر لچکدار ثابت ہوئی ہیں۔ تاہم وہ نقصان سے محفوظ نہیں ہیں۔

دس سال قبل پاڈووا اور وینس کی یونیورسٹیوں (جنگلات سے لے کر انجینیئرنگ اور ثقافتی ورثے تک کے شعبوں) کی ایک ٹیم نے شہر کی بنیادوں کی حالت کی جانچ پڑتال کی، جس کا آغاز 1440 میں ایلڈر کے لکڑی کے تنوں پر تعمیر ہونے والے فریری چرچ کے بیل ٹاور سے ہوا۔

فریری بیل ٹاور اپنی تعمیر کے بعد سے ہر سال 1 ملی میٹر (0.04 انچ) ڈوب رہا ہے یعنی پانی میں دھنس رہا ہے، مجموعی طور پر 60 سینٹی میٹر (تقریباً 24 انچ) تک۔ شہر کی بنیادوں کی تحقیقات کرنے والی ٹیم کا حصہ رہنے والی میکیونی کہتی ہیں کہ گرجا گھروں اور عمارتوں کے مقابلے میں بیل ٹاورز کا وزن زیادہ ہوتا ہے اور اسی وجہ سے وہ تیزی سے ڈوبتے ہیں۔

کیٹیرینا فرانسسکا ایزو میدان، بنیادی کھدائی، گرجا گھروں کے نیچے، بیل ٹاورز اور نہروں کے کنارے سے لکڑی کے نمونے جمع کرنے اور تجزیہ کرنے پر کام کر رہی تھیں، جنھیں اس وقت خالی کیا جا رہا تھا اور صاف کیا جا رہا تھا۔ انھوں نے کہا کہ انھیں خشک نہر کے نچلے حصے پر کام کرتے وقت محتاط رہنا پڑا۔

تحقیق کرنے والی ٹیم کے سامنے یہ آیا کہ انھوں نے جن ڈھانچوں کی تحقیقات کی، اس میں بُری خبر یہ تھی کہ ان میں لکڑی کو نقصان پہنچا تھا، لیکن اقھی خبر یہ تھی کہ پانی، کیچڑ اور لکڑی سب مل کر ایک دوسرے کو سہارا دیے ہوئے ہیں۔

انھوں نے اس عام خیال کو مسترد کر دیا کہ شہر کے نیچے لکڑی گل سڑ نہیں جاتی کیونکہ آکسیجن کی عدم موجودگی میں بھی لکڑی پر بیکٹیریا حملہ کرتے ہیں۔

لیکن بیکٹیریا کی کارروائی پھپھوندی اور کیڑوں کے عمل کے مقابلے میں بہت سست ہے جو آکسیجن کی موجودگی میں کام کرتے ہیں۔ پانی بیکٹیریا کے ذریعے خالی ہونے والے خلیات کو بھر دیتا ہے جس سے لکڑی کے تنے اپنی شکل برقرار رکھتے ہیں۔

لہٰذا اگر لکڑی کے تنوں کو نقصان پہنچ بھی جائے تو لکڑی، پانی اور کیچڑ کا پورا نظام شدید دباؤ میں بھی صدیوں تک ایک ساتھ کارآمد رہتا ہے۔

ایزو کہتے ہیں کہ ’فکر کرنے کی کوئی بات ہے؟ ہاں اور نہیں۔ لیکن ہمیں اب بھی اس قسم کی تحقیق کو جاری رکھنے پر غور کرنا چاہیے۔‘ 10 سال پہلے نمونے لینے کے بعد سے انھوں نے نئے نمونے جمع نہیں کیے تھے جس کی بنیادی وجہ لاجسٹکس ہے۔

میکیونی کہتے ہیں کہ ’یہ معلوم نہیں ہے کہ یہ بنیادیں مزید کتنے سو سال تک قائم رہیں گی۔ تاہم یہ تب تک جاری رہے گا جب تک ماحول ایک جیسا رہے گا۔ بنیاد کا نظام کام کرتا ہے کیونکہ یہ لکڑی، مٹی اور پانی سے بنا ہے۔

مٹی آکسیجن سے پاک ماحول پیدا کرتی ہے، پانی دونوں اس میں حصہ ڈالتے ہیں اور خلیوں کی شکل کو برقرار رکھتے ہیں اور لکڑی رگڑ فراہم کرتی ہے۔ ان تین عناصر میں سے کسی ایک کے بغیر، نظام تباہ ہو جاتا ہے۔

19 ویں اور 20 ویں صدی میں بنیاد کی تعمیر میں لکڑی کو مکمل طور پر سیمنٹ سے بدل دیا گیا تھا۔ حالیہ برسوں میں اگرچہ لکڑی کے ساتھ تعمیر کے ایک نئے رجحان نے بڑھتی ہوئی دلچسپی حاصل کی ہے جس میں لکڑی کی فلک بوس عمارتوں کا عروج بھی شامل ہے۔

لیسلی کا کہنا ہے کہ ’یہ اس وقت بہت اچھا مواد ہے اور واقعی اچھی وجوہات کی بنا پر۔ لکڑی ایک کاربن سنک ہے یہ بائیوڈی گریڈایبل ہے اور اس کی لچک کی بدولت اسے سب سے زیادہ زلزلے کے خلاف مزاحمت کرنے والے مواد میں سے ایک سمجھا جاتا ہے۔‘

میکیونی کہتے ہیں ’ہم آج کل پورے شہروں کو لکڑی پر تعمیر نہیں کر سکتے ہیں کیونکہ ہم کرہ ارض پر بہت زیادہ تعداد میں ہیں۔ ہاں لیکن اس بات سے انکار نہیں کیا جا سکتا کہ مصنوعی مواد کے بغیر اور موٹروں کے بغیر، قدیم معماروں کو صرف زیادہ ذہین ہونا پڑتا تھا۔‘

پوزرین کا کہنا ہے کہ ’وینس لکڑی کی بنیادوں والا واحد شہر نہیں ہے لیکن یہ واحد شہر ہے جو اب بھی اس تکنیک کے ساتھ باقی ہے اور بے حد خوبصورت بھی ہے۔‘

’وہاں ایسے لوگ تھے جنھوں نے مٹی کے میکانکس اور جیو ٹیکنیکل انجینیئرنگ کا مطالعہ نہیں کیا تھا۔ اور پھر بھی انھوں نے کچھ ایسا تیار کیا جس کے بارے میں ہم صرف خواب دیکھ سکتے ہیں۔

’وہ حیرت انگیز انجینیئر تھے جنھوں نے ان تمام خاص حالات کا فائدہ اٹھاتے ہوئے بالکل صحیح کام کیا۔‘