نیوزی لینڈ کا پاکستان کو 345 رنز کا ہدف: ’لاہور میں پیدا ہونے والے عباس نے ٹیلنٹ کا مظاہرہ پاکستان ہی کے خلاف کیا‘ – BBC News اردو

عباس کی کارکردگی پر تبصرہ کرتے ہوئے کرکٹ تجزیہ کار عاطف نواز کا کہنا تھا کہ نیوزی لینڈ کے محمد عباس نے کا شاندار ڈیبیو کیا ہے۔ ’لاہور میں پیدا ہونے والے 21 سالہ نوجوان نے اپنی پیدائش والے ملک کے خلاف صرف 24 گیندوں پر نصف سنچری بنائی اور نیوزی لینڈ کو اتنا بڑا سکور کرنے میں مدد دی۔‘

میچ کے بعد اپنی اننگز کے بارے میں بات کرتے ہوئے عباس کا کہنا تھا کہ، ’یہ بہت خاص تھا، میں ابھی اپنے جذبات لفظوں میں بیان نہیں کر سکتا۔‘

ان کا کہنا تھا کہ جب میں کھیلنے کے لیے میدان میں آیا تو مجھے شائقین کی تالیوں کی آوازیں آ رہی تھیں اور میں صرف اپنے والد کی محنت کے بارے مِیں سوچ رہا تھا۔

سوشل میڈیا پر ہر طرف صارفین نیوزی لینڈ کی طرف سے ڈیبیو کرنے والے پاکستانی بلے باز کی کارکردگی کے گن گاتے نظر آئے۔

ایکس پر ایک صارف عثمان خان کا کہنا تھا کہ عباس نے کھیل کے آخری اوورز میں پاکستان کے چوٹی بالرز کے خلاف ایک دلیرانہ اننگ کھیلتے ہوئے نیوزی لینڈ کا سکور 344 رنز تک پہنچا دیا۔

’یہ نام یاد رکھنا۔‘

ایک اور صارف کا کہنا تھا کہ محمد عباس نے ظاہر کر دیا ہے کہ ان کا انٹرنیشنل کرکٹ میں مستقبل شاندار ہے۔ ان کا کہنا تھا کہ عباس بیٹنگ کے علاوہ درمیانی رفتار سے بھی بالنگ بھی کر سکتے ہیں۔

سہیل عمران نامی صارف نے ٹویٹ کرتے ہوئے کہا کہ لاہور میں پیدا ہونے والے بلے باز نے اپنے ٹیلنٹ کا مظاہرہ پاکستان کے ہی خلاف کیا۔