طوفان، کشتی اور کوہ جودی: حضرت نوح کا قصہ جو اسلام سمیت تین مذاہب میں بیان کیا گیا – BBC News اردو

اسلامی سکالر وحید الدین خان اپنے مضمون ’حضرت نوح کا پیغمبرانہ رول‘ میں لکھتے ہیں کہ حضرت آدم پہلے انسان بھی تھے اور پہلے پیغمبر بھی۔

ان کی تحریر میں اسلامی تعلیمات کے حوالے سے درج ہے کہ ’اللہ نے حضرت آدم کو جو شریعت دی تھی، اُن کے بعد کی نسلیں اُس پر باقی رہیں۔ مگر دھیرے دھیرے ان میں زوال آیا۔۔۔ جب بگاڑ کی یہ حد آئی تو اللہ نے ان کے درمیان اُن ہی کی قوم سے پیغمبر نوح کو پیدا کیا۔‘

سورہ المومنون کی آیات ہیں کہ ’ہم نے نوح کو اُس کی قوم کی طرف رسول بنا کر بھیجا تھا تو اُس نے دعوت دی کہ میری قوم کے لوگو! اللہ کی بندگی کرو۔ اُس کے سوا تمھارا کوئی معبود نہیں ہے۔ پھر کیا (اُس کے شریک ٹھہرا کر تم اُس کے غضب سے) ڈرتے نہیں ہو؟‘

عہد نامہ قدیم کی کتابِ پیدائش میں بیان ہے کہ حضرت نوح کو ایک ایسی قوم میں بھیجا گیا جو بدکرداری، ظلم اور بداعمالیوں میں مبتلا تھی۔

عہد نامہ جدید (پطرس 2:5 میں) حضرت نوح کو ’راست بازی کی منادی کرنے والا‘ کہا گیا، جنھوں نے اپنی قوم کو خبردار کیا۔

قرآن کے مطابق حضرت نوح نے اپنی قوم کو مسلسل 950 سال تک حق کی طرف بلایا۔

اس سے متعلق قرآن کی سورہ العنکبوت میں ذکر ہے کہ: ’اور بے شک ہم نے نوح کو اس کی قوم کی طرف بھیجا، پس وہ ان میں پچاس کم ایک ہزار سال رہا۔‘

تورات (کتاب پیدائش) میں اس مدت کو حضرت نوح کی عمر بتایا گیا ہے۔

اس طویل مدت میں انھوں نے دن رات، اعلانیہ اور خفیہ، ہر طریقے سے اپنی قوم کو راہِ راست پر لانے کی کوشش کی۔ لیکن اس کے بقول ان کی قوم نے ان کی دعوت کو ٹھکرا دیا۔

قرآن کی سورہ المومنون میں ہے کہ ’اُس کی قوم کے سرداروں نے جو منکر تھے، کہا کہ یہ تو بس تمھارے جیسا ایک آدمی ہے۔ یہ تم پر برتری حاصل کرنا چاہتا ہے۔ اللہ کو اگر بھیجنا ہوتا تو فرشتے اتارتا۔ ہم نے اِس طرح کی بات اپنے اگلے بزرگوں میں تو کبھی سنی نہیں۔

‘کچھ نہیں، یہ ایک آدمی ہے کہ جس کو جنون لاحق ہو گیا ہے۔ سو کچھ دن اِس کا انتظار کرو، (اِس کے یہ وساوس ختم ہو جائیں گے)۔‘

سورہ القمر میں ہے کہ ‘ہمارے بندے کو اُنھوں نے جھوٹا قرار دیا اور کہا کہ یہ دیوانہ ہے اور وہ بری طرح جھڑکا گیا۔

’آخر اُس نے اپنے پروردگار سے فریاد کی کہ میں مغلوب ہو چکا، اب تو اِن سے بدلہ لے۔‘

کتاب ِپیدائش 6:5-7 میں ہے کہ خدا نے زمین پر انسانوں کی بداعمالیوں اور ان کے دلوں کے خیالات کی مسلسل برائی کو دیکھا اور دنیا کو تباہ کرنے کا فیصلہ کیا۔

قرآن میں ہے کہ جب قومِ نوح نے حق کو مسلسل ٹھکرایا اور ان کا مذاق اڑایا تو اللہ تعالیٰ نے حضرت نوح کو کشتی بنانے کا حکم دیا۔

سورہ المومنون میں ہے کہ ‘پس ہم نے اس پر وحی بھیجی کہ ہماری آنکھوں کے سامنے اور ہماری وحی کے مطابق ایک کشتی بنا۔‘

بائبل سے معلوم ہوتا ہے کہ اِس کشتی کا سارا نقشہ، اِس کی جزئیات کی تفصیل کے ساتھ، اللہ تعالیٰ نے حضرت نوح کو خود بتایا تھا تاکہ یہ آنے والی صورت حال کا مقابلہ کر سکے۔

عہد نامہ قدیم (پیدائش 6:14-16) کے مطابق حضرت نوح کو تفصیلی ہدایات دی گئیں کہ کشتی کو گوفر لکڑی سے بنایا جائے اور اس کی لمبائی 300 ہاتھ، چوڑائی 50 ہاتھ اور اونچائی 30 ہاتھ ہو، جس میں تین منزلیں ہوں گی، اور ایک کھڑکی بنائی جائے گی۔

مسیحیت میں بھی حضرت نوح کی کشتی کی کہانی یہی ہے۔

بائبل (عبرانیوں) میں ہے: ’ایمان ہی سے نوح نے، جب خدا کی طرف سے اس چیز کی خبر پائی جو ابھی دیکھنے میں نہ آئی تھی، خوف کھا کر اپنے گھرانے کے بچاؤ کے لئے ایک کشتی بنائی۔‘

تب حضرت نوح کو حکم ملا کہ وہ اپنے اہلِ خانہ، ایمان لانے والوں اور ہر جاندار کے جوڑے کو کشتی میں سوار کر لیں۔

سورہ المومنون میں ہے کہ ’جب ہمارا حکم آ جائے اور تنور ابل پڑے تو ہر قسم کے جانوروں میں سے ایک ایک جوڑا اور اپنےگھر والوں کو (کشتی میں) لے لو، مگر ان کو نہ لینا جن پر (عذاب کا) حکم ہو چکا ہے۔‘

اسی طرح سورہ ہود کی آیت ہے کہ ’اور ظالموں کے بارے میں مجھ سے بات نہ کرنا، بے شک وہ غرق کیے جانے والے ہیں۔‘

سورہ ہود ہی میں ہے کہ ’اور نوح نے اپنے رب کو پکارا اور کہا: اے میرے رب! میرا بیٹا (اکثر مفسرین کے مطابق کنعان) بھی میرے اہل میں سے ہے، اور یقیناً تیرا وعدہ سچا ہے، اور تو سب سے بڑا حاکم ہے۔‘

اللہ نے فرمایا: ’اے نوح! بے شک وہ تیرے اہل میں سے نہیں ہے، بے شک اس کا عمل نیک نہیں، پس مجھ سے وہ چیز نہ مانگ جس کا تجھے علم نہیں۔‘

قرآن کے مطابق، جب زمین سے پانی کے چشمے پھوٹ پڑے اور آسمان سے موسلا دھار بارش برسی، تو زمین پانی میں ڈوبنے لگی۔

سورہ القمر میں ہے کہ ’تب ہم نے موسلادھار بارش سے آسمان کے دروازے کھول دیے اور زمین کو (اِس طرح) پھاڑ ا کہ وہ چشمے ہی چشمے ہو گئی۔ پھر زمین و آسمان کا پانی اُس نشان پر باہم مل گیا جو اُس کے لیے مقرر کیا گیا تھا۔‘

تورات کی کتاب پیدائش کے ساتویں باب میں آسمان سے پانی برسنا اور زمین کے سوتوں میں سے نکلنا لکھا ہے۔

سورہ التحریم سے علم ہوتا ہے کہ حضرت نوح کی بیوی بھی ایمان نہیں لائی تھی اور وہ اپنی قوم کے ساتھ ہلاک ہوئی۔

اسی طرح جب طوفان آیا تو حضرت نوح کے ایک بیٹے نے کشتی پر سوار ہونے سے انکار کر دیا اور پہاڑ پر پناہ لینے کی کوشش کی۔

قرآن سورہ ہود میں اس واقعے کو یوں بیان کرتا ہے کہ ’نوح نے اپنے بیٹے کو پکارا اور کہا، اے میرے بیٹے! ہمارے ساتھ سوار ہو جا اور کافروں کے ساتھ نہ ہو۔ اس نے کہا، میں کسی پہاڑ کی پناہ لے لوں گا جو مجھے پانی سے بچا لے گا۔ نوح نے کہا، آج اللہ کے حکم سے کوئی بچانے والا نہیں، سوائے اس کے جس پر وہ رحم کرے۔‘

تورات میں حضرت نوح کی بیوی کا کوئی خاص ذکر نہیں ملتا، نہ ہی ان کے کسی بیٹے کی ہلاکت بیان کی گئی ہے۔ بلکہ، پیدائش 7:7 کے مطابق، نوح اپنی بیوی، بیٹوں (سام، حام، یافِث) اور ان کی بیویوں سمیت کشتی میں داخل ہوئے اور سب بچ گئے۔ تورات میں کسی بیٹے کی نافرمانی یا طوفان میں ہلاکت کا کوئی ذکر موجود نہیں۔

چونکہ عہد نامہ جدید میں حضرت نوح کی کہانی عہد نامہ قدیم (تورات) سے ماخوذ ہے، اس لیے یہاں بھی حضرت نوح کی بیوی یا کسی بیٹے کی ہلاکت کا کوئی ذکر نہیں ملتا۔ عبرانیوں 11:7 میں حضرت نوح کو ایمان کی مثال کے طور پر پیش کیا گیا ہے، اور کہا گیا ہے کہ ان کا پورا گھرانا نجات پا گیا۔

پھر طوفان نے سب کچھ بہا دیا اور زمین پر صرف وہی بچے جو کشتی میں سوار تھے۔ کتابِ جوبلیز میں طوفان کے وقت حضرت نوح کی عمر 600 سال بتائی گئی ہے۔