’دریائے سندھ کی اولاد‘: کشتیوں میں اپنے آشیانے بنانے والی ’کیہل برادری‘ خشکی پر بستیاں آباد کرنے پر کیوں مجبور ہوئی؟ – BBC News اردو

اب اس کمیونٹی کے ارکان دریائے سندھ سے منھ موڑ کر شہروں میں جھونپڑیاں یا کچے مکان بنا کر زندگی گزار رہے ہیں۔ اس کمیونٹی کے لوگ اب قریبی شہروں میں محنت مزدوری یا بھیک مانگ کر گزارہ کرنے پر مجبور ہیں۔

دنیا میں موسم کی تبدیلیوں، بارشوں اور پہاڑوں پر برف باری میں کمی کے علاوہ دریاؤں پر بیراج اور نہریں نکالنے سے اِن آدی واسیوں کے لیے دریا اب خشک ہوتا جا رہا ہے۔ موسمیاتی تبدیلیوں کے باعث اب جہاں دریا رُخ بدل رہے ہیں وہیں ان میں پانی کی روانی کم تر ہوتی جا رہی ہے اور اسی صورتحال کے باعث دریا کو اپنا ‘باپ’ کہنے والی اس کمیونٹی کی زندگی بھی متاثر ہو رہی ہے۔

اسی کمیونٹی سے تعلق رکھنے والی بشیراں مائی کے شوہر ایک کشتی کے مالک ہیں۔ بشیراں مائی اور ان کے خاندان نے کسی نہ کسی حد تک دریا سے اپنا تعلق آج بھی جوڑ رکھا ہے۔ وہ اور اُن کے بچے آج بھی کشتیوں کو ہی اپنا گھر سمجھتے ہیں اور وہیں رہتے ہیں۔

بشیراں مائی نے بتایا کہ ان کے گھر کے کوئی 8 سے 10 افراد ہیں جن میں اُن کے شوہر کے بھائی بھی شامل ہیں۔

دریائے سندھ میں تونسہ بیراج کے جس مقام پر بشیراں رہتی ہیں وہاں آج بھی آٹھ سے دس کشتیوں پر مکمل گھر آباد ہیں۔ خواتین انہی کشتیوں پر کھانا پکانے کا کام کرتی ہیں، انھوں نے دریا کے کنارے پر کچھ مویشی بھی رکھے ہوئے ہیں۔ تونسہ بیراج کے اس مقام پر رہنے والے یہ افراد اپنے آپ کو ’سندھی‘ کہتے ہیں۔

بی بی سی نے آدی واسیوں کے طرز زندگی اور ان کو درپیش مشکلات کو جاننے کے لیے ڈیرہ اسماعیل خان سے دریائے سندھ کے کنارے تونسہ بیراج تک کا سفر کیا ہے۔

سرائیکی علاقے سے تعلق رکھنے والے شاعر اور دانشور اشو لال کا کہنا ہے کہ دریا کے ساتھ جو کیا گیا ہے اس کے نتیجے میں ایک ایسی کمیونٹی (آدی واسی)، جو پہلے معاشی طور پر بہت بہتر تھی، اب کمزور ہو چکی ہے۔

اشو لال کی شاعری میں دریا کی ایک خاص اہمیت ہے۔ اُن کی ایک نظم میں دریا کو ‘ماں باپ’ اور اس میں بسنے والے لوگوں کو اس ’دریا کی اولاد‘ کہا گیا ہے۔

دریا او دریا، پانڑی تیڈے ڈونگھے

تو ساڈا ماں پیو، اساں تیڈے پونگے

دریائے سندھ میں کشتیوں کے اندر اپنی ساری زندگی گزارنے والے ان لوگوں کو سرائیکی زبان میں ’آدی واسی‘ کہا جاتا ہے یعنی انڈیجینئس لوگ۔

ماضی میں یہ کمیونٹی صوبہ سندھ کے شہر حیدر آباد سے صوبہ پنجاب اور خیبر پختونخوا کے سرحدی شہر اٹک تک دریائے سندھ میں کشتیوں میں ہی گزر بسر کرتی تھی۔

لیکن اب بارشوں کی کمی، دریائے پر ڈیم، بیراج اور نہروں کی تعمیر کے باعث اس کمیونٹی کا دریا ان سے چِھن گیا ہے۔

’سندھو بچاؤ ترلہ‘ کے نام سے قائم ایک تنظیم ان آدی واسیوں کی فلاح سے متعلق کام کرتی ہے۔ اس تنظیم سے منسلک خادم حسین بتاتے ہیں کہ ’یہ آدی واسی ماضی میں بڑی کمیونٹی کے طور پر بستے تھے اور ان کا گزر بسر کشتیوں میں اور دریا کے کنارے کنارے ہوتا تھا۔ یہ لوگ دریائے سندھ سے مچھلی کا شکار کرتے، خود بھی کھاتے اور گزر بسر کے لیے مارکیٹ میں بھی فروخت کرتے۔ اس کے علاوہ یہ کمیونٹی دریا میں افراد اور سامان کی ٹرانسپورٹیشن کا کام بھی کرتی تھی۔ دریا سے ہی ان کی زندگی وابستہ تھی۔ ان کا انحصار دریا کے ساتھ ساتھ واقع جنگلات پر بھی ہوتا تھا جہاں سے حاصل ہونے والی جھاڑیوں سے ان کی خواتین ٹوکریاں اور دیگر سامان تیار کرکے شہروں میں فروخت کرتے تھے۔‘

خادم حسین کے مطابق ان کی تنظیم کی جانب سے کیے گئے سروے میں سامنے آیا کہ دریائے سندھ پر چشمہ بیراج سے لے کر تونسہ بیراج تک کے 250 کلومیٹر کے درمیانی علاقے میں اِن آدی واسیوں کی تعداد 40 ہزار تک ہے۔ ’اُن میں اب کچھ دریا کے کنارے تو کچھ خانہ بدوشوں کی طرح شہروں میں زندگیاں گزارنے پر مجبور ہیں۔‘

تاہم بی بی سی اس سروے کی آزادانہ تصدیق نہیں کر سکا ہے۔

دریا پر بیراج اور نہریں بننے سے جہاں پانی کی روانی متاثر ہوئی وہیں مچھلی پکڑنے کے لیے ٹھیکیداری کا نظام رائج ہوا جس کے باعث آدی واسیوں کا روزگار متاثر ہوا۔

میرا اپنا تعلق خیبر پختونخوا کے شہر ڈیرہ اسماعیل خان سے ہے اور مجھے یاد ہے کہ بچپن میں ڈی آئی خان کے مقام سے گزرنے والے دریائے سندھ کے ایک کنارے سے دوسرا کنارہ مشکل سے ہی نظر آتا تھا یعنی دریا کا پاٹ بہت چوڑا تھا۔

ڈیرہ اسماعیل خان کے مضافات میں تھویا فاضل کے مقام پر خشک ہوتے دریا کے قریب ایک بستی میں اس کمیونٹی سے تعلق رکھنے والے والے درجنوں خاندانوں کے خیمے اور کچے مکان ہیں۔

یہاں بسنے والے خاندان گزر بسر کے لیے جھاڑیوں اور لکڑیوں سے ٹوکریاں بناتے ہیں۔

یہ کام وہ اپنے آباؤ اجداد کے دور سے کرتے آ رہے ہیں۔ ماضی میں کشتیوں کے ذریعے وہ دریائے سندھ کے کناروں پر آباد جنگلوں سے ٹوکریاں بنانے کے لیے درکار لکڑیاں اور جھاڑیاں کاٹ کر لاتے تھے مگر اب چونکہ دریا کے ساتھ ساتھ جنگل بھی ختم ہو رہے ہیں تو انھیں یہ لکڑیاں بھی مشکل ہی سے مل پاتی ہیں۔

صفیہ بی بی کے ہاتھ مردوں کی طرح سخت ہو چکے ہیں اور اُن پر چھالے پڑے ہوئے ہیں۔ ٹوکری بناتے بناتے انھوں نے ہمیں بتایا کہ دیگر ذرائع آمدن ختم ہونے کے باعث اب ان کا بڑا دارومدار ان ٹوکریوں کی فروخت پر ہی ہے اور اس کے لیے انھیں بہت زیادہ کام کرنا پڑتا ہے۔ ’یہ ایک ٹوکری ڈھائی سو سے تین سو روپے میں فروخت ہو جائے گی۔‘

صفیہ بی بی نے بتایا کہ یہ مشکل کام ہے جسے کرنے سے ان کے ہاتھوں کی جلد پھٹ جاتی ہے۔ ’مشکل یہ ہے کہ اب یہ جھاڑیاں بھی نہیں ملتیں۔ پہلے جنگل تھے، جھاڑیاں بھی تھیں مگر اب جنگلوں کے رقبوں پر لوگوں نے فصلیں کاشت کر لی ہیں۔‘

’ہم یہ جھاڑیاں توڑ کر لاتے ہیں پھر انھیں پانی میں رکھتے ہیں۔ اس کے بعد انھیں خشک کرکے تراش خراش کرتے ہیں اور اس کے بعد ان کی مدد سے ٹوکریاں بنائی جاتی ہیں۔‘

یہاں رہنے والے بہت سے افراد نے بتایا کہ اُن کی کمیونٹی کی بیشتر خواتین اب یا تو قریبی علاقوں میں لوگوں کے گھروں میں کام کرتی ہیں یا بھیک مانگ کر گزارہ کرتی ہیں جبکہ مرد بھی اپنے طور پر تھوڑی بہت مزدوری کر لیتے ہیں اور بیشتر خالی ہاتھ ہی گھر واپس لوٹتے ہیں۔

ماضی میں دریا میں کشتیوں پر آباد ان خاندانوں کو مقامی افراد نے جھونپڑیوں اور کچے کمروں کی تعمیر کے لیے زمین دی ہے۔ ’لیکن اس زمین کے بدلے میں ہم ان کے گھروں کے کام کرتے ہیں اور اس کے علاوہ مزدوری کبھی مل جاتی ہے اور کبھی بھوکے گزارہ کرنا پڑتا ہے۔‘

ڈیرہ اسماعیل خان میں بہنے والے دریائے سندھ میں اب پانی اتنا کم ہے کہ ماضی میں پانی پر تیرتی کشتیاں اب خشکی پر پڑی نظر آتی ہیں اور ٹوٹ پھوٹ کا شکار ہیں۔

محمد اسلم کی کشتی بھی اب خشکی پر ہی ہے اور وہ اس کی مرمت کے لیے پریشان ہیں۔ محمد اسلم نے بی بی سی کو بتایا کہ وہ خود حیران ہیں کہ دریا کے ساتھ کیا ہو رہا ہے۔ ’ہمارے بزرگ تو اس دریا سے فائدہ اٹھا لیتے تھے، مزدوری مل جاتی تھی، کشتی کا کام چل جاتا تھا۔ لیکن اب نہ تو پانی ہے اور ناں ہی لوگ اس طرف آتے ہیں۔‘

انھوں نے بتایا کہ ’پہلے ہمارے باپ دادا مچھلی کا شکار کر لیتے تھے لیکن اب اگر ہم مچھلی پکڑ لیں تو ٹھیکیدار کے لوگ آ جاتے ہیں اور ہم سے جرمانہ وصول کیا جاتا ہے۔‘

محمد اسلم نے بتایا کہ اب وقت پر بارش نہیں ہوتی تو دریا بالکل سوکھ جاتا ہے اور اس صورتحال نے اُن کی زندگی بہت متاثر کی ہے۔

اشو لال کہا کہنا ہے کہ دریاؤں میں بسنے والی اس کمیونٹی کی زندگی اس وقت انتہائی مشکل ہے۔ ’اُن کی زندگی یا فلاح و بہبود پر زیادہ کام نہیں کیا گیا ۔ خشک ہوتے دریا سے جہاں ان کی روایتی زندگی کو خطرہ ہے وہیں موسمی تبدیلی سے دریا کے قریب آبادی بھی متاثر ہو رہی ہے۔‘