توند: عزت اور مرتبے کی علامت سمجھے جانے والا بڑھا ہوا پیٹ صحت کے لیے بڑا خطرہ کیسے بنا اور اس سے چھٹکارہ کیسے ممکن ہے؟ – BBC News اردو

تاہم یہ معاملہ صرف چربی کی مقدار کا نہیں بلکہ یہ بھی نہایت اہم ہے کہ چربی جسم میں کہاں جمع ہو رہی ہے۔

جنوب ایشیائی افراد میں چربی اکثر جلد کے نیچے اور پیٹ کے اردگرد جمع ہوتی ہے تاہم پیٹ کے اندرونی حصے میں گہرائی تک نہیں جاتی جیسا کہ ویسیرل فیٹ (visceral fat) میں ہوتا ہے۔

اگرچہ جنوبی ایشا میں رہنے والے افراد میں جگر اور لبلبے جیسے اہم اعضا کے گرد نقصان دہ چربی نسبتاً کم ہو سکتی ہے تاہم تحقیق سے پتہ چلتا ہے کہ اس خطے کے افراد کے جسم میں موجود چربی کے خلیے (fat cells) اسے جلد کے نیچے محفوظ کرنے میں ناکام رہتے ہیں۔

نتیجتاً اضافی چربی ان اہم اعضا میں جمع ہونے لگتی ہے جو جسم کے میٹابولزم کو کنٹرول کرتے ہیں مثلاً جگر اور یہ صورتحال کسی بھی شخص میں ذیابیطس اور دل کے امراض کے خطرات کو بڑھا دیتی ہے۔

سائنسدان تاحال ہمارے جسموں میں چربی کی تقسیم کے اس عمل کے پیچھے موجود بائیولوجیکل وجوہات کو مکمل طور پر سمجھ نہیں پائے ہیں۔

اگرچہ اس بارے میں کئی تحقیقات کی جا چکی ہیں لیکن کوئی بھی مطالعہ اس مخصوص رجحان کی مکمل وضاحت نہیں کر سکا۔

ایک نظریہ یہ بھی ہے کہ اس رجحان کی جڑیں انسان کے ارتقائی عمل سے جا ملتی ہیں۔ انڈیا میں صدیوں تک قحط اور غذائی قلت رہی ہے جس کے باعث کئی نسلوں تک لوگ غذائی قلت کا شکار رہے۔ ایسے حالات میں انسانی جسم نے غذا کے بحران کے دوران بقا کے لیے خود کو ڈھالا۔

جسم کو توانائی ذخیرہ کرنے کے لیے ایک جگہ درکار تھی اور چونکہ پیٹ سب سے زیادہ پھیلنے والا حصہ ہوتا ہے اس لیے یہ قدرتی چربی کے ذخیرے کا مرکز بنتا گیا۔

وقت گزرنے کے ساتھ جب خوراک وافر دستیاب ہو گئی تو یہ چربی کا ذخیرہ بھی بڑھتا گیا یہاں تک کہ یہ انسانی جسم کے لیے خطرے کی حد تک پہنچ گیا۔

اس نظریے سے فورٹس سی ڈاک سینٹر آف ایکسیلینس برائے ذیابیطس، میٹابولک امراض اور اینڈوکرائنولوجی کے سربراہ ڈاکٹر انوپ مشرا کافی حد تک متفق دکھائی دیتے ہیں۔

اُن کے مطابق ’یہ ایک ایسا نظریہ ہے جس کی بنیاد کا قیاس ارتقائی عمل پر رکھا گیا ہے۔ جسے ثابت تو نہیں کیا جا سکتا لیکن اس میں کچھ نہ کچھ وزن ضرور موجود ہے۔‘

گذشتہ سال انڈین اوبیسٹی کمیشن سے وابستہ ڈاکٹروں نے ایک تحقیق میں ایشیئن انڈینز کے لیے موٹاپے کی نئی تعریف پیش کی گئی جس میں انھوں نے باڈی ماس انڈیکس سے آگے بڑھتے ہوئے جسمانی چربی اور صحت کے ابتدائی خطرات کے درمیان تعلق کو بہتر انداز میں بیان کیا گیا۔

انھوں نے اس کے لیے ایک طبی نظام وضع کیا جس میں چربی کی تقسیم، اس سے منسلک بیماریوں اور جسمانی کارکردگی کو مدنظر رکھا گیا۔ اس تحقیق میں دو مرحلے بیان کیے گئے جن کے مطابق:

ایسے افراد میں عمومی طور پر غذا، ورزش اور بعض اوقات دوا کے ذریعے طرز زندگی میں تبدیلی ہی کافی ہوتی ہے۔

یہ مرحلہ زیادہ خطرے کی نشاندہی کرتا ہے اور اس میں زیادہ سنجیدگی کے ساتھ مکمل علاج کی ضرورت ہوتی ہے۔

یہ درجہ بندیاں علاج کی ضرورت کو طے کرنے میں مدد دیتی ہے۔

جیسے ہی پیٹ کے اردگرد چربی محسوس ہونے لگے اس کو روکنے کے لیے فوری اقدام اٹھانا ضروری ہوتا ہے۔ طبی ماہرین کے مطابق اس کے لیے وزن کم کرنے والی جدید دوائیں جیسے سیماگلوٹائڈ اور تیرزیپیٹائڈ مؤثر ثابت ہو رہی ہیں۔

ڈاکٹر انوپ مشرا مزید کہتے ہیں کہ ’یہ سُن کر شاید آپ حیران ہوں تاہم بعض اوقات بالکل معمولی وزن رکھنے والے افراد کے پیٹ میں بھی خطرناک حد تک چربی موجود ہو سکتی ہے۔‘

انڈین ڈاکٹرز کا کہنا ہے کہ پیٹ کی چربی میں اضافے کی ایک بڑی وجہ طرزِ زندگی میں تبدیلیاں ہیں جیسے فاسٹ فوڈ، ٹیک اوے کی سہولت، جھٹ پٹ تیار ہونے والے کھانے اور چکنائی سے بھرپور گھریلو پکوان بھی اس کی وجوہات میں شامل ہیں۔

تحقیقات سے معلوم ہوا ہے کہ سنہ 2009 سے سنہ 2019 کے درمیان کیمرون، انڈیا اور ویتنام میں انتہائی پراسیسڈ خوراک اور مشروبات کی فروخت میں تیزی سے اضافہ ہوا ہے۔

ماہرین کے مطابق انڈین شہریوں کو مغربی ممالک کے مقابلے میں کہیں زیادہ سخت طرزِ زندگی اپنانے کی ضرورت ہے۔

جہاں یورپی مردوں کو ایک ہفتے کے دوران ڈھائی گھنٹے کی ورزش کافی ہو سکتی ہے وہیں جنوبی ایشیائی مردوں کو ایک ہفتے میں چار سے پانچ گھنٹے تک ورزش کرنا ضروری ہے کیونکہ اس خطے کے افراد کے جسم کا میٹابولزم سست ہوتا ہے اور چربی کو مناسب ذخیرہ کرنے کی صلاحیت بھی یورپی افراد کے مقابلے میں انتہائی کم ہوتی ہے۔

ڈاکٹر مشرا کے مطابق ’ہمارے جسم اضافی چربی کو سنبھالنےمیں اتنے اچھے نہیں۔‘

مختصراً یہ کہ توند صرف مذاق کا موضوع نہیں رہی بلکہ ایک خطرے کی گھنٹی ہے اور انڈیا میں یہ صورتحال صحت کے بحران کی جانب اشارہ کر رہی ہے۔